La tienda del BOE

Este volume, que fai o dezasete dos incluídos na devandita serie, vén completar un traballo de hai oito anos no que xa se realizara unha importante primeira aproximación ao caudal escrito de e sobre o autor. Mais, o feito de térselle dedicado o Día das Letras do 2009, coa fervenza de textos publicados ao redor da súa figura que iso supón, xustifica sobradamente a necesaria actualización levada a cabo na presente entrega.

Seguramente Luís Alonso Girgado, Alexandra Cillero Prieto, Élida Abal Santorum, María Cuquejo Enríquez, Teresa Monteagudo Cabaleiro e Montserrat Vázquez Riveiro, coautoras e coautor do libro, non deran con todos e cada un dos textos, sen excepción, escritos por e sobre Piñeiro. Ora ben, o que é indiscutible é que a súa é a maior e mellor compilación de libros, epistolarios, volumes colectivos, prólogos, limiares, edicións, traducións, escritos en prensa e entrevistas do autor, como tamén é o máis extenso catálogo de monografías, artigos nos medios, entradas en dicionarios, enciclopedias e manuais, colaboracións en volumes de autoría colectiva e estudos parciais en libros centrados na súa vida e obra, o que, coido, é sobrada razón para ter presente este caderno, imprescindible para o coñecemento integral do persoeiro de Láncara.